Madoken, yon jèn atis 35 zile pote pou nou : Pierre Tomrolf alyas Madoken fèt 22 me 1999 nan vil senmak
Mercredi 10 mars 2021 ((rezonodwes.com))– Ti jèn bway la ki gen 21 rekòt kafe sou tèt li, chwazi rap poul denonse sa ki pa bon. « Mizik mwen fè. Map gade sitiyasyon de prekarite ki gen nan anvirònnmanm’ poum’ di m’ paka rete pasif, mwen itilize mizik mwen poum ka milite kont sistèm nan ». Tankou yon fraz mwen renmen repete ki di : « Map batay pou yon kòz, map batay pou sam’ swete a, m pap kite sosyete chanjem menm ka chanje sosyete a ».
Mizik Madoken fè chita sou sa lap viv. Nou ta kapab di yon atis ki konsyan de zouti kreyatif lap mannevre a. Siw komanse koute zèv atis la, nan yon bat je wap konstate gen yon liris pèsonèl fò kap degaje nan kreyasyon misye . Zev atis la tou se espas li chante mizèl’ ak soufrans li nan anfans li. « Pale de mwen son tristès ki gen san kaye, ki fèm pran rap la pou refij poum delivrem san plim san kaye ».Yon lot bò, se ochan ak lanmou atis la ap chante pou tout fanm ayisyen kap okipe timoun san papa. « Yo pat janm bay manmanm baz malgre l te la anba je ».
Kalite lirism Madoken
Atis la dekri nan zèv li pwòp soufrans li. Nou ta kab di nan langaj literè, Madoken se yon atis lirik. Li plis mize sou pwòp kalamitel nan ekspresyon atistik li, men sa pa vle di tou, li pa pale de pwoblèm lòt moun kap viv yo oubyen kap andire menm pwoblèm avèl. Chwazi dekri reyalite wap viv se chwazi dekri reyalite plizyè lòt moun ap viv. Dayè, yon atis pa ekri pou tèt li vre men pito pou sosyete a, paske se sosyete a ki enspire atis la. Kidonk, sosyete a se enpirsyon atis la.
Kijan Madoken flow ?
Fòs Madoken pa chita sou divès teknik flow ki egziste yo. Ti jen bway la plis bay enpotans ak tèks li. Anplis, pwopozisyon mizikal atis la se yon pwopozisyon altenativ. Yon mizik kap denonse. Yon mizik kap pwopoze. Nan kalte flow atis la, Madoken gen yon debi senp men ki chanje kèk fwa e ki bay fòm ak pwogresyon yo ki gen menm mizikalite pawol yo nan koumansman. Malgre li jèn, Madoken pwouve li gen yon bèl abilte nan fasonl ritme pwezil poul chante menm lè nap admèt dimansyon sa dwe travay plis. Men bon, nou tout konnen atitid atis la chita nan kantite tan lap kreye.
Kèk teknik Madoken itilize nan rap li ak kouman atis la ekri
Pou kèk teknik nou rive swiv nan dimansyon atistik Madoken, nou konstate atis la itilize anpil fakerims, yon teknik anpil rapè ki santre mizik yo sou lirik yo itilize. Atis la konstwi rim li yo tou nan yon liy ki pa fidel. San dout, se pou penmet mesaj la parèt klè kou dlo kokoye enpi evite kreye chevi nan vès yo.(Vès se fason yo di rim nan rap).Nan sans sa, nou deja gon lide sou kalite pwodiksyon atis la pote nan djakout li!
Nouvo pwojè atis la
19 mas kap vini la , Madoken ap sòti yon mizik pou anonse yon EP lap gen poul lage. Selon sa atis la di nou se yon EP (Extended Play) kap gen sou li 5 mizik. Pwojè sa ap pote non SE LAM. BOUSKE, DEZESPWA ak NOSTALJI se kèk pami mizik kap sou pwojè a. Yon EP ki makonnen soufrans, melankoli ak dezespwa atis la. Nap tou pwofite raple nou, yon EP(Extended Play) se yon fòm mizik ki te tanmen nan lane 50 yo,e ki pi long ke yon mizik estanda ki dire 3 minit kek segond. Disk la pa dwe depase 6 moso mizik. Men apa sa, atis la lib poul chante sijel vle. Se kalite foma sa , ti jèn bway la ap gen poul pote pou nou nan nouvo pwojè li a kap sòti nan yon dat ki pa twò lwen.
Kisa nou kab atann de jèn atis la ?
Mizik Madoken fèt nan sakrifis. Tankou tout jèn atis ki ap fou pou mizik, dèfwa ou blije vann saw genyen oubyen boule kòb lekol ou pouw kab peye estidyo. Dayè, nou tout konn sa map pale a ! Pa gen anyen nou pap fe pou sa nou renmen. Ebyen jèn atis la li menm, tou di nou mizik li fèt nan sakrifis. Poun konprann sa pi byen, al pran sann koute EP a lè li soti. Anplis, atis la gon addlip ki toujou parèt tou « Sakrifis wi negganm ».
E sanm pa nan kache men voye wòch, mwen kab di nou Madoken pwomèt anpil bagay malgre endistri mizik ayitisyen an ap konnen anpil pwoblèm. Yon mache ki pa byen estriktire e ki pa vreman penmèt atis yo viv de zèv yo tout bon vre. Madoken chwazi fon mizik kap denonse, yon estil mizikal ki pa penmèt malerezman atis viv de li an ayiti. Men, atis la konsyan de tout bagay sa yo e li pare poul kontinye pouse bourik li.
Bidler Nelson
Journaliste Indépendant
bidlernelson@gmail.com