Mèkredi 27 janvye 2021 ((rezonodwes.com))– Abitan komin Kafou leve kanpe kont kidnapin. Yo desann nan lari e lanse yon »operasyon desann vit tente ».
Dapre manifestan yo, se nan machin vit tente pifò kidnapin yo fèt e se sa ki lakòz bandi yo konn ap pase ak otaj yo nan mitan tout popilasyon an san yo pa sispèk.
Se konsa, depi yon machin vit tente ap pase nan lari a, yo oblije li desann vit yo pou yo ka enspekte e gade si pa gen moun yo anlve ladan l.
Manifestan yo menase pou fè pi gwo mouvman. Yo di si kidnapin pa sispann y ap bloke tout biwo leta nan Kafou.
Mouvman sa fèt apre bandi ak zam yo pa rive idantifye te kidnape yon predikatè nan Legliz “Kay an Kay” nan Akachon, Julbin Robuste (frè Giovanni).
Otaj la, ki gen 33 lane e ki gen 4 pitit, te sou yon motosiklèt nan zòn Wout Ray ak Bizoton lè yon machin mak Toyota kwaze devan l epi pote l ale.