Kanpay vaksinasyon kòmanse ayè Samdi nan Larisi. Gouvènman bay travayè sosyal yo, anplwaye medikal yo ak pwofesè yo yon vaksen ki rele Sputnik V nan 70 sant nan kapital la, Moskou
Dimanch 6 desanm 2020 ((rezonodwes.com))– Kanpay vaksinasyon Larisi a kòmanse. Vil Moskou nan Samdi 5 desanm te kòmanse vaksinen travayè ki a risk nan swasanndis sant vaksinasyon ki louvri nan tout vil la.
Nan premye etap la, gen entansyon pou touche travayè sosyal, anplwaye medikal ak pwofesè yo. Otorite yo te di, « Se sitwayen nan gwoup risk prensipal yo ki ap vaksinen, akoz aktivite pwofesyonèl yo ki fè yo an kontak ak anpil moun. »
Larisi se te youn nan premye peyi ki anonse devlopman yon vaksen nan mwa Out, menm anvan esè klinik yo te kòmanse.
Kreyatè vaksen an te anonse yon to efikasite 95% mwa pase a, selon rezilta preliminè yo. Daprè yo, vaksen an pral pi bon mache epi pi fasil pou estoke ak transpòte pase kèk lòt.
Vaksen an, administre nan de dòz 21 jou apa. Li pral gratis pou sitwayen Larisi, men li pa obligatwa.
Samdi, otorite sante yo di ke pandan premye faz sa a, vaksen an pa ta dwe administre bay travayè ki gen plis pase 60 lane, moun ki gen maladi kwonik, fanm ansent oswa k ap bay tete.
Men, yo pa di ki lè tretman an ap disponib pou piblik la an jeneral.